Sudanda vətəndaş müharibəsi səngimir

Sudanda vətəndaş müharibəsi səngimir
  02 Aprel 2025    Oxunub:558
Sudanın Silahlı Qüvvələri ilə Çevik Reaksiya Qüvvələri (RRF) arasında çərşənbə axşamı ölkənin cənubundakı Şimali Kordofan əyalətinin mərkəzi olan strateji El-Obeyd şəhərində döyüşlər gedib.
AzVision.az xəbər verir ki, Sudan Silahlı Qüvvələrindəki mənbəyə istinad edən “Anadolu” agentliyinin yazdığına görə, hərbçilər RRF-ni canlı qüvvə və texnika sarıdan böyük itkilərə məruz qoyub və onların qoşunları geri çəkilib. Qarş tərəf hələlik bu məlumatı şərh etməyib.

Yerli sakinlər El-Obeydin qərb məhəllələrində ağır silahlarla döyüşlər başladığını, lakin sonradan vəziyyətin normallaşdığını bildiriblər. Bundan əvvəl RRF El-Obeydin artilleriyadan atəşə tutulmasını intensivləşdirib.

Keçən həftə Sudan Silahlı Qüvvələri paytaxt Xartumu tam nəzarətə götürdüklərini və orada qalan RRF mövqelərini məhv etdiklərini açıqlayıblar. Həmçinin, son həftələrdə hərbçilərin Xartum, Əl-Qəzirə, Ağ Nil, Şimali Kordofan, Sennar və Mavi Nil əyalətlərindəki əraziləri RRF-dən geri aldıları açıqlanıb.

Qeyd edək ki, Sudanda hərbçilərlə RRF arasında 2023-cü il aprelin 15-dən davam edən silahlı qarşıdurmada ən azı 28 min insan həlak olub. 14 milyondan çox insan evlərini tərk etmək məcburiyyətində qalıb.

Hazırda hərbçilər Sudanın şimalına və şərqinə, RRF isə ölkənin cənubuna və demək olar ki, bütün Darfur bölgəsinə nəzarət edir.

Sahil İsgəndərov
AzVision.az



Teqlər: Sudan   müharibə  





Xəbər lenti


Azvision.az ©2014 | Bütün hüquqları qorunur