AzVision.az xəbər verir ki, bu barədə aktyorun qızı “The New York Times (NYT)” qəzetinə açıqlamasında bildirib. 2014-cü ildə Kilmerə qırtlaq xərçəngi diaqnozu qoyulmuşdu. O, xəstəliyə qalib gələ bilsə də, bunun nəticəsində səsini tamamilə itirdi.

Culyard Dramatik İncəsənət məktəbini bitirən Uill Kilmer 1981-ci ildə teatrda çıxış etməyə başlayıb. Onun ilk kino rolu 1984-cü ildə “Tamamilə məxfi!” komediyası olub. 1986-cı ildə “Ən yaxşı atıcı (Top Gun)” adlı döyüş filmində əsas rollardan birini oynayıb. Prokatda 353 milyon dollar qazanan bu film aktyora dünya şöhrəti gətirdi.

1991-ci ildə o, Oliver Stounun eyniadlı filmində “The Doors” qrupunun vokalisti Cim Morrisonu oynadı. Yeri gəlmişkən, filmdəki bütün mahnıları Uill Kilmerin özü ifa edib.
1995-ci ildə aktyor “Həmişəlik Betmen (Batman Forever)” filmində super qəhrəman Betmeni canlandırdı. Elə həmin il Maykl Mannın “Mübarizə (Heat)” adlı döyüş filmi nümayiş etdirildi və Kilmer ən yaxşı ikinci plan aktyoru kateqoriyasında Saturn mükafatına namizəd oldu. O, “Dəlib keçən öpüş (Kiss to Blow Out - 2005)” kriminal komediyasına görə oxşar nominasiya alıb.

2000-ci ildə “Qırmızı planet” fantastik filminin maliyyə iflasına uğramasından sonra aktyorun karyerası kəskin tənəzzülə başladı. 100 milyon dollardan çox büdcəsi olan bu film cəmi 33 milyon dollar gəlir əldə etdi. 2004-cü ildə aktyor “Zəka ovçuları” trillerində və Oliver Stounun “İsgəndər” tarixi filmində ikinci plan rollarını oynayıb.

2014-cü ildə xərçəng xəstəliyinə görə traxeotomiya və kimyəvi terapiya kursları keçib. Uill Kilmer süni intellektin köməyi ilə səsini “qaytarmağı” bacardı – Böyük Britaniyanın “Sonantic” şirkəti aktyorun köhnə yazılarını emal edərək onun üçün xüsusi səs modeli yaratdı. Bunun sayəsində o, 2022-ci ildə çıxan “Top Qan: Maverik” filmində oynaya bildi.

Ümumilikdə Uill Kilmerin hesabında yüzə yaxın rolu var. O, həmçinin “Morq küçəsindəki qətllər” (1986), “Söyüd” (1988), “Məni yenidən öldür” (1989), “İldırım ürək” (1992), “Doktor Moro adası” (1996), “Xəyal və qaranlıq” (1996), “Müqəddəs” (1991), “Pollok” (2000), “Solton dənizi” (2001), “Kor üfüq” (2003), “Spartalı” (2004), “Cani” (2008), “Yeddi fut” (2012) filmlərində çəkilib.

Sahil İsgəndərov
AzVision.az