AzVision.az xəbər verir ki, Azərbaycan Prezidenti İlham Əliyev Mavritaniya, Albaniya və Timor-Leste prezidentlərini təbrik edib. Mavritaniya İslam Respublikasının Prezidenti Məhəmməd Vələd Əbdüləzizə göndərilən təbrikdə deyilir:

"Mavritaniyanın milli bayramı - Müstəqillik günü münasibətilə Sizi və bütün xalqınızı Azərbaycan xalqı adından və şəxsən öz adımdan ürəkdən təbrik edirəm.

Ümidvaram ki, Azərbaycan ilə Mavritaniya arasındakı dostluq və əməkdaşlıq münasibətlərinin inkişafı bundan sonra da xalqlarımızın mənafelərinə xidmət edəcəkdir.
Sizə möhkəm cansağlığı, işlərinizdə uğurlar, dost Mavritaniya xalqına əmin-amanlıq və tərəqqi diləyirəm".

Azərbaycanın dövlət başçısı Albaniya Prezidenti Buyar Nişanini də təbrik edib.

Məktubda deyilir: "Albaniya Respublikasının milli bayramı - Müstəqillik günü münasibətilə Sizi və bütün xalqınızı Azərbaycan xalqı adından və şəxsən öz adımdan səmimi qəlbdən təbrik edirəm.

Ümidvaram ki, Azərbaycan ilə Albaniya arasındakı münasibətlər xalqlarımızın mənafelərinə uyğun olaraq daim dostluq və əməkdaşlıq zəminində inkişaf edəcək və genişlənəcəkdir.

Sizə möhkəm cansağlığı, işlərinizdə uğurlar, dost Albaniya xalqına daim sülh və firavanlıq arzulayıram".

Prezident İlham Əliyev Timor-Leste Demokratik Respublikasının Prezidenti Taur Matan Ruaka təbrik məktubu ünvanlayıb.

Təbrikdə bildirilir: "Ölkənizin milli bayramı - Müstəqilliyin elan edilməsi günü münasibətilə Sizi və xalqınızı ürəkdən təbrik edirəm.

Ümidvaram ki, Azərbaycan ilə Timor-Leste arasında təşəkkül tapmaqda olan münasibətlər dostluq və əməkdaşlıq ruhunda inkişaf edəcək və genişlənəcəkdir.

Sizə ən xoş arzularımı yetirir, dost xalqınıza sülh və firavanlıq diləyirəm".