AzVision.az “Report”a istinadən xəbər verir ki, Böyük Britaniya hökumətinin press-relizində bildirilir.

Görüşə Böyük Britaniya hökumətinin nazirləri - energetika naziri Ed Milibend, inkişaf naziri Anneliz Dodds və ekologiya naziri Stiv Rid rəhbərlik ediblər.

Üç dəyirmi masa bərpa olunan enerjiyə keçidin maliyyələşdirilməsinə, iqlim dəyişkənliyinə dayanıqlılığa sərmayə yatırılmasının sürətləndirilməsinə və plastik çirklənməyə son qoymaq üzrə qlobal razılaşmaya həsr olunub.

“Görüşlər Böyük Britaniyanın özəl sektordan və maliyyə institutlarından daha çox maliyyə cəlb etmək üçün yeni və genişləndirilmiş maliyyələşdirmə hədəfinə nail olmaqda aparıcı rol oynamağı və inkişaf etməkdə olan ölkələrdə iqlim dəyişikliyi ilə mübarizə və onun nəticələrinin azaldılması üçün yardımı genişləndirməyi planlaşdırdığı COP29-dan əvvəl baş tutub”, - məlumatda deyilir.

İqlim modellərinin dəyişməsi Braziliyanın Amazon bölgəsinin bütün müşahidə tarixi ərzində ən ciddi quraqlıqlardan birini yaşamasına gətirib çıxarıb, Banqladeşdə getdikcə artan şiddətli daşqınlar və fırtınalar isə alçaqda yerləşən regionları dəniz səviyyəsinin yüksəlməsi ilə su altında qalmaq riski ilə üz-üzə qoyur. Həm Böyük Britaniyada, həm də dünyada iqlim dəyişikliyi ilə mübarizə enerji təhlükəsizliyini, iqtisadi artımı və indiki və gələcək nəsillərin qorunmasını təmin etmək üçün vacibdir.

Hər bir dəyirmi masada hökumətin iqlim gündəliyini dəstəkləmək üçün iştirakçılarla razılaşmaların əldə edilməsinə və Bakıda səmərəli dialoq üçün zəmin yaradılmasına diqqət yetirilirdi.

Energetika naziri Milibendin moderatorluğu ilə “yaşıl” enerjiyə keçid üçün maliyyənin səfərbər edilməsinə dair dəyirmi masada həmçinin BEA-nın icraçı direktoru Fatih Birol, Azərbaycanın maliyyə naziri Samir Şərifov və Dünya İqtisadi Forumunun prezidenti Borge Brende də iştirak ediblər.

“İştirakçılar razılaşdılar ki, formalaşmaqda olan bazara və inkişaf etməkdə olan iqtisadiyyata malik ölkələrdə təmiz enerjiyə sərmayənin artırılması qlobal səviyyədə razılaşdırılmış hədəflərə nail olmaq - 2030-cu ilə qədər bərpa olunan enerjini üç dəfə artırmaq və enerji səmərəliliyi göstəricilərini ikiqat artırmaq üçün açardır və bu, Paris Sazişində nəzərdə tutulduğu kimi, qlobal temperatur artımını 1,5 °C ilə məhdudlaşdırmağa imkan verəcək”, - məlumatda deyilir.

“Gələn həftə COP29-da biz iqlim böhranı ilə mübarizədə ambisiyaları artırmaq üçün digər ölkələrlə işləyəcəyik, çünki indi qətiyyətli fəaliyyət zamanıdır”, - Milibend deyib.

İnkişaf naziri Doddsun rəhbərlik etdiyi və uyğunlaşma və dayanıqlılıq üçün iqtisadi əsaslanmanın formalaşdırılması üzrə olan başqa bir dəyirmi masada iştirakçılar iqlim uyğunlaşmasının maliyyələşdirilməsində, xüsusən də nəticələrin yüngülləşdirilməsi ilə müqayisə olunduqda, ciddi boşluq olduğunu və bunun həll edilməsinin zəruriliyini qəbul ediblər. Onlar həmçinin investisiya qərarlarının qəbulu zamanı iqlim risklərinin nəzərə alınmasının təmin edilməsinin zəruriliyindən danışıblar.

“İştirakçılar iqlimə dayanıqlı maliyyələşmə üçün iqtisadi əsasın yaradılması zəruriliyi və dövlət-özəl sektor tərəfdaşlığın bu məqsədə çatmaq üçün vacib olduğu barədə razılığa gəliblər”, - məlumatda deyilir.

Dodds bildirib ki, iqlim dəyişikliyinin təsirlərinə dayanıqlılıq yaratmaq üçün təcili olaraq əlavə tədbirlərə ehtiyac var: “Biz iqlim böhranının getdikcə daha çox dağıdıcı təsirlərinə tab gətirə biləcək qlobal iqtisadiyyat və infrastruktur qurmalıyıq. Bu, özəl maliyyələşdirməni açmaq və lazım olan 387 milyard dollara çatmaq üçün bütün qlobal maliyyə sisteminin diqqətini tələb edəcək”.

“Bizim müzakirələrimiz COP29-un iqlimin maliyyələşdirilməsinə diqqətinin əsasını qoyur və birlikdə bu problemin miqyasına cavab verə biləcəyimizə inam yaradır”, - o əlavə edib.

Ekologiya naziri Stiv Ridin sədrliyi ilə plastik çirklənmə ilə bağlı müqaviləyə dair dəyirmi masada aparıcı müəssisələrin, ticarət şirkətlərinin və maliyyə institutlarının rəhbərləri noyabrın sonlarında Pusanda keçiriləcək BMT danışıqlarında plastik çirklənməyə dair iddialı, hüquqi cəhətdən icbari olan sazişin razılaşdırılmasının vacibliyini müzakirə ediblər və 2040-cı ilə qədər plastik çirklənməyə son qoymağa çağıran bəyanat imzalayıblar.