AzVision.az –a bu barədə Bakı Metropoliteninin mətbuat xidmətindən məlumat veriblər. Bildiriblər ki, Metropolitenin saytından vətəndaşlar arasında sorğu keçirilib və artıq sorğuya yekun vurulub:

“ Saytımızda internet istifadəçiləri ilə sərnişinlər arasında keçirilən sorğuya yekun vurulub. Metropolitenin rəsmi saytı vasitəsilə aparılan sorğuda ümumən 20976 nəfər iştirak edib. Onların cəmi 304 nəfəri və ya 1,45 faizi metrodan istifadə etmədiyini bildirir. Qalan respondentlər isə bu və ya digər dərəcədə metro istifadəçisidir. Saytdan daimi məlumatlar əldə edənlərin 38,18 faizi və ya 8009 nəfəri metropolitendən gündəlik nəqliyyat vasitəsi kimi istifadə edir. Ay ərzində bir neçə dəfə metrodan istifadə edənlərin də sayı təxminən gündəlik istifadəçilərə yaxındır – 7952 nəfər və ya 37,9 faiz. Səsvermədə iştirak etmiş sərnişinlərimizin 3558 nəfəri isə həftə ərzində bir neçə dəfə metro vasitəsilə şəhərdə hərəkət edir. Nadir hallarda metropolitendən istifadə edənlərin sayı da azdır. Onlar 1153 nəfər və ya sorğuda iştirak edənlərin 5,5 faizini təşkil edirlər”.

Metropolitendən verilən məlumata görə, saytda daha bir sorğu keçiriləcək: “Saytımızın əsas səhifəsindəki müvafiq guşədə növbəti sorğumuz dərc olunub. Saytımızın istifadəçilərindən bu sorğuda da fəal iştirak etmək xahiş olunur. Çünki sizin iştirakınız bir sıra hallarda verilmiş suallar ətrafında Sizin də təkliflərinizi nəzərə alaraq, xidmət səviyyəsini yüksəltməyə, müəyyən addımları atmağa kömək edir. Növbəti sorğumuz metropolitendən istifadə qaydaları ilə bağlıdır. Bununla əlaqədar, fikir və təkliflərinizi bizə [email protected] elektron poçt ünvanı ilə çatdıra bilərsiniz. Təkliflər və suallarınızla əlaqədar saytımızda oxucularla sıx ünsiyyət də qurulacaq”.