Prezident yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyevin Orxan Zeynalovla bağlı müraciətinə cavab verilib.

Şuradan AzVision.az-a daxil olan məlumata görə, Rusiya Federasiyası Ictimai Palatasının sədrinə ünvanlanan məktuba Moskva şəhər prokrorluğu münasibətini açıqlayıb.

Məktubda Şura sədrinin O.Zeynalovun həbs olunarkən zorakılığa məruz qalması ilə bağlı narahatlığına cavab olaraq bununla bağlı oktyabrın 24-də məhkəmə tibbi ekspertizasının təyin olunduğu, noyabrın 11-də isə onun yekun nəticəsinin açıqlanma müddətinin daha bir ay uzadıldığı qeyd edilib.

Prokurorluq yalnız tibbi ekspertizanın yekun rəyindən sonra həbs edilərkən soydaşımıza qarşı hər hansı qanun pozuntusu hərəkətinin yol verilməsi məsələsinə hüquqi cəhətdən tamlıqla aydınlıq gətiriləcəyini bildirib.

Moskva şəhər prokrorluğu O.Zeynalovun həbsi ətrafında mətbuatda gedən iddiaların onun həbs olunarkən zorakılığa məruz qalması ilə bağlı hər hansı cinayət işi açmağa yetərli olmadığını da vurğulayıb.

Xatırladırıq ki, Şura sədrinin Rusiya Federasiyası Ictimai Palatasının sədri Yevgeni Velixova ünvanlandığı məktubda məişət zəminində baş verən bu hadisənin milli müstəviyə çıxarılmasından, Orxan Zeynalovun hüquqlarının kobud şəkildə pozulmasından və zorakılıga məruz qalmasından ciddi narahatlıq ifadə olunub.

Şura bundan sonra da O. Zeynalovun həbsi ilə bağlı məsələni nəzarətdə saxlamaqda davam edəcək.

Fatimə Kərimli