AzVision.az xəbər verir ki, bunu Prezident Administrasiyasının İctimai-siyasi şöbəsinin müdiri Əli Həsənov deyib.

Onun sözlərinə görə, Azərbaycanda ümumilikdə qeyri-kommersiya qurumlarının sayı 4 mini ötüb: “Azərbaycan dövləti hazırda vətəndaş cəmiyyəti təsisatları üçün ən böyük donor rolunda çıxış edir. Bu məqsədlə təsis edilmiş və ictimai sektorun yaxından iştirakı ilə formalaşdırılmış Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası və Azərbaycan Respublikasının Prezidenti yanında Gənclər Fondu bütün QHT-lərin, o cümlədən gənclər təşkilatlarının layihələrinin maliyyələşdirilməsi sahəsində ixtisaslaşmış qurumlardır. Son 3 il yarımda yalnız bu 2 təşkilatın xətti ilə 5 mindən çox layihəyə 33 milyon manatdan artıq vəsait verilib”.

PA rəsmisi bildirib ki, Azərbaycan dövləti yalnız yerli QHT-lərə qrant verməklə kifayətlənmir: “Qeyri-Hökumət Təşkilatlarına Dövlət Dəstəyi Şurası 2013-cü ildən etibarən xarici QHT-lərin sülh, demokratiya, hüquq müdafiəsi, siyasi plüralizmin inkişafı, Azərbaycan reallıqlarının dünyaya çatdırılması və s. mövzularda təqdim etdikləri layihələri maliyyələşdirməyə başlayıb. Dövlətin vətəndaş cəmiyyəti ilə bağlı strateji hədəflərinin “Azərbaycan - 2020: gələcəyə baxış” İnkişaf Konsepsiyasında əksini tapıb”.

Elvin Abdulqədirov
AzVision.az